Nang dahil lamang sa pikunan sa biruan nagawang patayin ng isang 25-anyos na lalaki ang kanyang itinuturing na bespren kahapon ng madaling araw sa Port Area, Maynila. Na kilala ang nasawi na si Alvin Asio, newsboy, na hindi na umabot pang buhay sa pagamutan sanhi ng tinamong isang tama ng bala ng baril sa ulo. Pinaghahanap naman ng pulisya ang suspect na nakilala lamang sa alyas Jimmy Topak ng Baseco Compound, Tondo, Maynila na mabilis na tumakas matapos ang isinagawang krimen. Ayon sa ulat ng pulisya naganap ang insidente dakong alas-12:50 ng madaling-araw habang nakikipag-inuman ang biktima sa may Baseco Compound nang biglang dumating ang suspect at binaril ito nang malapitan sa ulo. Napag-alaman na dating mag-bespren ang dalawa pero noong nakaraang buwan ay nagkalamat ang kanilang pagkakaibigan makaraang magkapikunan sa biruan. Una nang hinabol ng saksak ng suspect ang biktima pero naka-iwas ito at kahapon nga ay nakakuha ito ng tiyempo at binaril ito sa ulo. (Ludy Bermudo)