Kritikal sa pagamutan ang isang mister matapos na tubusin nito ang atraso ng kanyang bunsong kapatid makaraang abangan at pagtatagain ang una ng samurai ng kanyang kapitbahay, kamakalawa ng gabi sa Pasay City.
Kasalukuyang inoobserbahan pa sa Pasay City General Hospital (PCGH) ang biktimang si Joseph Dino, 47, ng Malibay, Pasay sanhi ng mga tinamong taga sa batok at kanang balikat, habang mabilis namang tumakas ang suspect na si Roberto Capco ng E. de Guzman St., Malibay ng naturan ding lungsod.
Batay sa isinagawang imbestigasyon ni PO3 Simon Respicio, Jr., ng Station Investigation and Detective Management Section (SIDMS) ng Pasay City Police, matagal na umanong hina-hunting ng suspect ang nakababatang kapatid ng biktima na nakilala sa pangalang Noel bunga ng hindi pa nabatid na atraso nito sa suspect.
Dakong alas-7 naman ng gabi kamakalawa nang matiyempuhan ng suspect si Dino malapit sa isang basketball gym sa Malibay at tinanong sa biktima kung saan matatagpuan ang kanyang kapatid na matagal nang may atraso sa kanya.
Nang hindi umano ituro ni Dino ang kinaroroonan ng kapatid ay sa kanya nabaling ang ngitngit ng suspect kung saan agad nitong hinugot ang dala-dalang samurai at walang habas na pinagtataga ang biktima.
Nang duguang bumulagta sa semento ang biktima ay mabilis na tumakas ang suspect at dala ang ginamit na armas at agad namang isinugod ng mga bystander ang una sa nasabing pagamutan. (Rose Tamayo-Tesoro)