Mahigit sa 8,000 mga bumbero na hindi pa nakakatapos ng pag-aaral at walang sapat na eligibility ang nanganganib ngayon na matanggal sa Bureau of Fire Protection (BFP) matapos ang limang taong palugit na ibinigay sa kanila ng Civil Service Commission (CSC).
Kinumpirma ni BFP chief, Director Enrique Linsangan na nanganganib na maparalisa ang kanilang operasyon pagsapit ng taong 2009 kung hindi pa rin makakatalima ang mga bumbero sa pangangailangan ng CSC.
Ipinaliwanag nito na base sa Republic Act 9263, may prohibisyon na binibigyan ng limang taon ang isang empleyado ng gobyerno na hindi tapos ng pag-aaral para makakuha ng diploma upang maging legal ang kanyang pagtatrabaho. Magtatapos na umano ang palugit na ito ngayong 2009 kaya hinihiling nila ngayon sa CSC na magpalabas pa ng lima pang taon para makatupad ang mga bumbero na hindi nagawang mag-aral sa unang limang taon na palugit na ibinigay.
Ilan umano sa 8 libong mga bumbero ay nakapag-exam na sa National Police Commission (Napolcom) kaya hinihiling rin nila na bigyan ng “one time promotion” ang may mga hawak ng pagpasa sa exam.
Sinabi ni Linsangan na kaya hindi nagawang makapag-aral ng mga bumbero ay dahil sa pagtutok umano sa pag-apula sa mga sunog at pagresponde sa mga kalamidad kaya hindi na kaya ng katawan at pag-iisip. (Danilo Garcia)