Nakumpiska ng mga ahente ng National Bureau of Investigation (NBI) ang may 1,855 piraso ng pekeng Jiao Li & Device whitening soap at cream na nagkakahalaga ng P11,300 sa pagsalakay sa ilang tindahan sa Binondo, Maynila, sa ulat kahapon. Kaugnay ito sa reklamong inihain ng Jiao Li and Device company sa tanggapan ni NBI-Regional Director Atty. Elfren Meneses, kaugnay sa trademark infringement umano ng kanilang produkto.
Kabilang sa sinalakay ang Alex Ong and/or Tailun General Merchandise, sa Room 201/201A, 2nd floor at Room 607, Don Mariano Uy Building, Oriente St., Binondo, Manila at stall nos. GUG 43-45 at GUG 48-50 sa New Divisoria Mall, Binondo, Manila bitbit ang search warrant na ipinalabas ni Judge Antonio M. Eugenio Jr., ng Manila Regional Trial Court (RTC) Branch 24. Ipinagharap na ng kasong paglabag sa Republic Act 8293 (Trademark Infringement) ang may-ari ng mga establisimyentong nabanggit. (Ludy Bermudo)