Dahil sa pagsemplang sa motorsiklo, natimbog ang dalawang holdaper na riding-in-tandem habang hinahabol sila ng mga awtoridad, kamakalawa ng gabi sa Quezon City.
Kulungan ngayon ang binagsakan ng mga suspek na sina Ronald Felix, 41, bus driver; at Archie Razol, 27, empleyado at residente ng #4 San Luis St., Brgy. Gulod, Novaliches.
Sa ulat ng Quezon City Police District-Station 3, naganap ang insidente dakong alas-9:30 ng gabi sa Service Road ng North Diversion Road, Brgy. Unang Sigaw, ng naturang lungsod.
Nagsasagawa ng checkpoint operation ang mga pulis sakay ng mobile patrol 018 nang parahin ang isang motorsiklo dahil sa hindi pagsusuot ng helmet ng dalawang sakay nito. Sa halip na huminto, pinasibad ng mga suspek ang kanilang sasakyan dahilan para habulin sila ng mga pulis. Nawalan naman ng kontrol sa manibela ang mga suspek sanhi upang sumemplang ang mga ito.
Nang tulungan ng mga awtoridad ang dalawa sa pagkakatumba nila, dito na nadiskubre sa mga ito ang isang sumpak, baril at isang plastic sachet na pinaniniwalaang ipinagbabawal na gamot kung kaya hinihinala na sangkot ang mga ito sa panghoholdap sa Commonwealth Avenue. (Danilo Garcia)