Isang mekaniko ang pinatay sa saksak ng isang lalaking sintu-sinto habang naglalakad ang biktima kamakalawa ng gabi sa Caloocan City. Nakilala ang nasawi na si Zaldy Llanes, 41, ng #2456 Fidel St., Gagalangin, Tondo, Manila. Mabilis namang nawala ang suspek na isa umanong sintu-sinto.
Ayon sa report, dakong alas-8:30 ng gabi nang maganap ang insidente sa panulukan ng A. Mabini at L. Pula Sts., Brgy. 32, Maypajo ng nabanggit na lungsod.
Nabatid na naglalakad ang biktima sa naturang lugar nang makasalubong nito ang suspek.
Walang sabi-sabing pinagsasaksak ang biktima ng suspek. Ilang saglit at humandusay ang duguang biktima, kung kaya’t mabilis na isinugod ito ng mga tanod sa pagamutan, ngunit binawian ito ng buhay habang ginagamot.
Humahalakhak pa umano ang suspect ng lisanin ang lugar dala ang gamit na patalim. (Grace dela Cruz)