Dalawa katao ang nasawi matapos silang magulungan ng isang pampasaherong bus na nakabangga sa sinasakyan nilang motorsiklo sa highway ng Calamba City, Laguna kamakalawa.
Halos hindi na makilala ang biktimang si Dexter Correa, 25-anyos na nakaladkad pa ng ilang metro ng bus at residente ng Cabuyao, Laguna.
Kasalukuyan namang inaalam ng mga awtoridad ang pangalan ng isa pang nasawing biktima na kaangkas nito sa motorsiklo na humagis sa lakas ng pagkakabangga at nabagok ang ulo na siya nitong ikinamatay.
Sa ulat ng Laguna Provincial Police Office (PPO), dakong ala-1:15 ng madaling-araw ng maganap ang insidente sa kahabaan ng national highway, Brgy. Lecheria ng lungsod ng Calamba.
Ayon sa mga imbestigador kasalukuyang bumabagtas sa bahagi ng Crossing, Calamba City ang motorsiklong Honda na may plakang TU-6323 na minamaneho ni Correa kaangkas ang isa pang biktima nang salpukin ng Astro Liner Bus na may plaka namang TWL -351.
Ang bangkay ng mga biktima ay dinala na sa La Funeraria Senerez para maisailalim sa awtopsiya.
Humihimas na ng rehas na bakal ang driver ng bus na inaresto ng mga elemento ng Calamba City Police. (Joy Cantos)