Isang dalagang Tsinay na opisyal ng isang bangko ang personal na nagtungo sa pulisya upang ipagharap ng reklamo ang isang radio technologist na umano’y nagnakaw sa kanyang gintong singsing na may brilyante at nagkakahalaga ng P.5 million sa loob ng isang klinika sa Caloocan City, ayon sa ulat ng pulisya kahapon.
Kinilala ni Supt. Jose Ramirez Valencia, hepe ng Station Investigation and Detective Management Branch ng Caloocan City Police ang biktimang si Susan Go y Poh, 53, Assistant Vice-President ng China Trust Bank.
Pormal namang inireklamo ng biktima ang suspek na si Melissa Miguel, 23, dalaga, radio technologist ng Centralle Medical Diagnostic & Polyclinic Inc. sa unang palapag ng AMILI Realty and Development Compound sa M. H. Del Pilar Street, Caloocan City.
Ayon sa salaysay ng biktima, dakong alas-11:00 ng umaga nang magtungo siya kasama ang isa nitong empleyada sa naturang klinika upang magpa-ECG na bahagi ng kanilang annual exa mination sa opisina.
Si Miguel umano ang nagsagawa ng conduct ng ECG at bago mag-umpisa ito ay pinatanggal umano ang gintong singsing ni Go na may tatlong batong brilyante na nagkakahalaga ng P500,000.
Dahil alam ng biktima ang halaga ng kanyang singsing, mahigpit pa umano niyang ibinilin at ibinigay ito sa suspek subalit sa hindi inaasahan ay nakalimutan ng biktima na kunin ito kay Miguel pagkatapos ng ECG.
Pagkalabas ng naturang klinika ay biglang naalala ng biktima ang kanyang alahas kaya agad itong bumalik upang kunin ang naiwang singsing subalit hindi na naabutan nito ang suspek at sinabing nakauwi na ito.
Dahilan nito ay agad na nagtungo sa him pilan ng pulisya ang biktima at pormal na ipagharap ng reklamo ang suspek.