Mistulang pinagsakluban ng langit at lupa ang umano’y mainit na pakikipagtalik ng isang ginang sa kanyang kalaguyong sekyu matapos na maaktuhan ang mga ito ng mister ng una at kapwa ipaaresto sa pulisya, kamakalawa ng gabi sa Muntinlupa City.
Hindi na nagawang makapalag pa ng mga suspect na sina Maria Fe Paquera Nogales, 36, residente ng 2749 Nudeas St., Rodriguez Subdivision, Brgy. Putatan, Muntinlupa City at ang kalaguyo nitong si Andy Baflor, 25, security guard ng Metropolis Mall na nasa Alabang nang kapwa arestuhin ang mga ito ng nagrespondeng mga pulis.
Nabatid na bago ang pag-aresto, nakatanggap umano ng impormasyon si Rommel Nogales, 44, contractor, ng Lot 20 Blk 131 Phase 2, Mabuhay City, Cabuyao, Laguna na ang kanyang misis ay may kinakasamang lalaki sa naturang lugar.
Dahil dito, agad siyang nakipag-ugnayan kay SPO2 Rey Quizon ng Muntinlupa City Police, upang magharap ng reklamo at dakong alas-11 ng gabi nang isagawa ang pagdakip sa mga suspect na inabutan pa umanong magkasiping sa kama ng mga arresting team sa loob ng inuupahan nilang bahay sa nabanggit na lugar. (Rose Tamayo-Tesoro)