Inaresto ng mga tauhan ng Philippine National Police-Aviation Security Group (Avsegroup) ang isang overseas Filipino worker (OFW) matapos na mahulihan ng may 15 pirasong bala sa kanyang bagahe sa Ninoy Aquino International Airport (NAIA) kamakalawa ng gabi. Tanging iyak na lamang ang nagawa nang papaalis na pasahero na nakilalang si Marivic Elada, 40, tubong Bauan, Batangas nang arestuhin ito at hindi na payagan pang makasakay sa kanyang flight patungo sa Italy kung saan siya nagtatrabaho bilang domestic helper.
Ayon kay P/Supt. Efren Labiang, hepe ng 1st Police Center for Aviation Security (PCAS) pasakay na sana si Elada kasama ang dalawang anak sa KLM flight 804 nang maaninag sa X-ray security machine ang mga hugis bala sa loob ng bagahe nito. Dahil dito, agad na pinabuksan ng X-ray operator na nakilalang si Norma Galvez ang bagahe ni Elada at sa isinagawang manual inspection ay nakita ang 10 pirasong bala ng kalibre .45 at limang pirasong bala ng kalibre .22 na nakaipit sa tatlong set ng kurtina sa kanyang bagahe.
Sa isinagawang pagsisiyasat, sinabi ni Elada na ang mga kurtina ay ipinakiusap lamang sa kanya ng anak ng kanyang kasamahang domestic helper sa Italy na nakilalang si Gloria Mortel.
“May nagpakilalang anak ni Glo na nagtungo sa aming bahay at ipinakisuyo ang mga kurtina. Hindi ko naitanong ang kanyang pangalan, at ang pagkakamali ko ay hindi ko na pinabuksan iyong cellophane dahil tiwala naman ako na walang kakaibang laman iyon bukod sa kurtina lang. Hindi ko akalain na mapapahamak ako,” nanlulumong pahayag ni Elada sa Avsegroup.
Gayunman, nakumbinsi si Labiang na nagsasabi ng totoo ang naturang pasahero pero ipinaliwanag niya na malinaw na nakasaad sa batas na kung kanino nahuli o nakita ang mga ipinagbabawal na items lalo na ang bala at anumang uri ng armas at pampasabog ang siyang mananagot. (Ellen Fernando)