Isang pinaniniwalaang kalansay ng babae na 67 taon nang nakalibing ang nahukay sa isang lote sa San Andres Bukid, Manila kahapon ng umaga.
Natuklasan ng isang Richard Perado ang buo pang kalansay habang naghuhukay siya para sa isang poso negro ng pi napagawaan niyang bahay sa loteng pag-aari ng isang Charito Fran sa kanto ng Amatista at Francisco Streets sa San Andres Bukid.
Nabatid mula kay Det. Rommel Del Rosario ng Manila Police District-Homicide section na isang 71-anyos na kapitbahay ni Perado na si Marybobot Ventura ang nagsabing mayroong isang babaeng inilibing sa naturang lugar noong araw. Pinaniniwalaan ni Ventura na ang naturang babae ang siyang nahukay na kalansay.
Inilahad pa ni Ventura na isang araw lamang umanong pinaglamayan ang bangkay ng babae at dahil sa kahirapan ay inilibing na rin sa naturang lugar.
Aniya, dating masukal at maraming punongkahoy sa nabanggit na lugar bago pinatayuan ng bahay.
Lumaki na umano si Ventura sa naturang lugar kaya’t kilala nito ang mga sinaunang tao na tumira dito.