Matapos ang ilang buwang pagpapalamig, muli na namang sumalakay ang mga kilabot na carjacker sa Quezon City matapos na tangayin ang isang mamahaling van buhat sa isang family driver, kahapon ng umaga.
Dumulog kahapon sa Kamuning police station ang biktima na si Martin Bagsik, driver, kung saan iniulat nito ang pagkatangay ng minamaneho niyang itim na Nissan Patrol (XRW-998).
Sa salaysay nito, naganap ang insidente dakong alas-5:30 ng umaga sa tapat ng bahay ng kanyang amo sa #68 Scout Chuatoco, Brgy. Roxas, ng naturang lungsod. Sinabi nito na ihahatid na niya sa paaralan ang mga anak ng kanyang amo nang dumating ang dalawang suspek na armado ng kalibre .45 baril.
Agad umano siyang tinutukan ng baril ng mga ito at sapilitang pinababa ng sasakyan. Mabilis namang minaneho ng mga suspek ang van patungo sa direksyon ng Quezon Avenue.
Matapos ang insidente, saka lamang nagpakalat si Supt. Dante Narag, hepe ng Station 10, ng mga tauhan upang humabol sa mga suspek. (Danilo Garcia)