Tumindi ang tensyon sa isinasagawang canvassing sa Valenzuela City matapos na magsagawa ng barikada ang mga supporters ni mayoralty candidate Bobbit Carlos sa city hall dahil sa ulat na magkakaroon ng ballot switching. Dakong ala-1 ng madaling-araw nang dumagsa ang daan-daang mga supporters sa Valenzuela City Hall at nagprotesta ukol sa umano’y dayaan sa boto. Dahil dito, pansamantala munang inihinto ang canvassing ng mga boto sa lungsod ng Board of Canvassers buhat sa Commission on Elections (Comelec) dahil sa naturang kaguluhan. Wala namang inabutan ang pinuno ng mga nagpo-protesta at mga kinatawan ng Board of Canvassers sa loob ng city hall na umano’y may ginagawang pagpapalit ng balota dahil sa malinis ang kuwarto na kanilang tinutukoy. Natigil lamang ang protesta ng mga tao nang kausapin ito ni Valenzuela deputy chief, Supt. Nestor Dioso at tiniyak na ginagawa nilang lahat ang pagbabantay upang matiyak na malinis ang halalan at wala silang kinakampihan. (Danilo Garcia)