Nilalapatan ng lunas ngayon sa Fort Bonifacio General Hospital ang biktima na nakilalang si Rommel Barbero, 13-anyos, ng Block 20, Lot 11, 11th Avenue, HHSG, Barangay Signal Village ng nabanggit na lungsod. Nagtamo ito ng tama ng bala sa ulo buhat sa isang sumpak.
Tumakas naman ang suspect na kinilala lamang sa isang "alias Gigi Ginoo", hindi binanggit ang edad, ngunit isa itong menor de edad, nakatira rin sa nabanggit na lugar.
Sa inisyal na imbestigasyon ni SP01 Conrad Mapili, ng Criminal Investigation Unit (CIU), Taguig City Police, naganap ang insidente dakong alas-11:30 ng gabi sa kahabaan ng Phase 2, Pinagsama Village, Barangay Western Bicutan, Taguig City.
Napag-alaman na kasama ng biktima sa covered court ang kanyang mga kaibigang sina alyas Langga; alyas Mark at alyas Mikko nang mamataan sila ng suspect na si Ginoo.
Napag-alaman na kabilang sa kalabang grupo ng suspect ang tatlong kaibigan ng biktima kung kaya nang magpang-abot ang mga ito ay nagkaroon ng riot.
Napagitna naman sa sagupaan at nadamay ang biktima na minalas pang siyang tinamaan ng bala ng sumpak sa ulo.
Mabilis namang tumakas ang suspect nang makitang humandusay ang biktima.
Patuloy naman ang isinasagawang follow-up operation para sa ikaaaresto ng suspect. (Lordeth Bonilla)