Patay na nang idating sa Pasay City General Hospital (PCGH) ang suspect na si Nasrodin Hadji-Mesa-Maute, alyas "Alvin", 23, taga-Block 2, Lopez Village, Las Piñas City. Nagtamo ito ng ilang tama ng bala sa iba’t ibang bahagi ng katawan buhat sa hindi pa batid na kalibre ng baril.
Lumalabas sa imbestigasyon ng Pasay City police na naganap ang insidente dakong alas-11:45 ng gabi sa Macapagal Blvd., Pasay City.
Nakatanggap ng reklamo ang mga pulis na nanggugulo sa nabanggit na lugar ang suspect kung kaya’t agad na rumesponde ang mga ito.
Nadakip naman ng mga pulis ang nabanggit na suspect at nang kapkapan, nakita sa bulsa nito ang ilang pirasong shabu.
Base sa nakalap na impormasyon ng mga pulis, kilala umanong tulak ng droga ang suspect.
Habang nasa loob ng mobile patrol car ang suspect upang dalhin sa headquarters, inagawan umano nito ng baril si PO1 Giliohn Labaton, dahilan upang mag-agawan ang mga ito.
Maagap namang bumunot ang isa pang pulis na si PO2 Romel Orel ng kanyang service firearm hanggang sa pinaputukan nito ang nagwawalang suspect.
Mabilis na isinugod ang suspect sa pagamutan ngunit hindi na ito umabot nang buhay.