Umaga na nang matagpuan ng mga tauhan ng Manila Fire Department ang bangkay ng biktimang si Rolando Sarmiento, 53, jeepney operator ng 511 Esguerra St., Tondo, Maynila.
Kritikal naman ang kasambahay nito na si Ferdinand Bulusan, 39, na kasalukuyang ginagamot sa Philippine General Hospital.
Sa ulat ni SFO1 Wilson Tana, arson investigator, lumitaw na ang sunog ay nagsimula dakong ala-1:06 kahapon ng madaling-araw sa likurang bahagi ng pinto sa unang palapag ng bahay ng mga biktima.
Umabot sa ikatlong alarma ang sunog at naapula lamang dakong ala-1:33 ng madaling-araw.
Hindi na umano nakalabas ng kanyang kuwarto si Sarmiento na natagpuan na lamang ng mga awtoridad kahapon ng umaga malapit sa kanyang higaan.
Sinasabing nagawa naman umanong makatalon ni Bulusan mula sa ikalawang palapag ng bahay, gayunman 90 porsiyento pa rin ng katawan nito ang nalapnos dahil sa sunog. Hindi pa rin matiyak kung ano ang posibleng pinagmulan ng sunog. (Gemma Amargo Garcia)