Nasawi noon din ang biktimang si Sandrin Peñalosa, habang ginagamot naman sa Ospital ng Makati ang ina nitong si Useisan, 22; kapatid na si Chrisaysan, 1 taong gulang, mga tiyuhing sina Jeffrey, 16; Alvin Peñalosa, 14; at isa pang tiyuhin at ang lola na hindi kaagad nakuha ang pangalan.
Sugatan at ginagamot din sa nabanggit na pagamutan sina Jose Manares, 60; at pahinante nitong si Gerri Sierra, 53.
Mabilis namang tumakas ang driver ng trailer truck na may plakang TAC-582.
Sa inisyal na imbestigasyon ng pulisya, naganap ang insidente dakong alas-2:45 ng madaling-araw sa ilalim ng Magallanes Interchange, PNR Site sa harapan ng Magallanes Village, Makati City.
Nabatid na galing ang naturang trailer truck sa southern area at habang binabagtas nito ang northern bound lane sa nabanggit na lugar ay unang ginitgit at sinalpok nito ang isang Isuzu Elf na may plakang WPU 411 na minamaneho ni Manares kasama ang pahinante nitong si Sierra.
Tuluyang nawalan ng preno ang truck at sinalpok naman ang bahay ng pamilya Peñalosa kung saan mahimbing na natutulog ang mga biktima.
Sa ngayon ay nasa impounding area na ng Southern Traffic Enforcement Unit ang nasabing truck at tinutugis ngayon ang tumakas na driver nito. (Lordeth Bonilla)