Nasa kustodya na ng pulisya at sinampahan ng kasong kidnapping sa Pasay City Prosecutor’s Office ang suspect na si Hiroshi Shirakata, ng Ogikubo, Suginami Ku, Tokyo, Japan.
Dinakip ito base sa reklamong iniharap ng kanyang misis na si Cristina Shirakata, 26, ng Lot 23, Block 12, Sapphire St., EMCCO Subdivision, Meycauyan, Bulacan.
Ayon kay Cristina, noong Setyembre 2, 2005 dumating sa bansa ang kanyang asawa . Nagpunta lamang ito sa bansa para bisitahin ang kanilang anak na si Athena.
Nabatid na habang naka-check-in sila sa isang hotel sa Roxas Blvd., Pasay City ay ipinuslit ng Hapones ang kanilang anak habang siya ay nasa loob ng comfort room.
Nadiskubre pa ng ginang na balak dalhin ng kanyang mister ang kanilang anak sa Japan.
Kaagad na nagsuplong si Cristina sa pulisya, kung saan kamakalawa ay natunton ang Hapon sa Ninoy Aquino International Airport (NAIA) habang tangkang ipuslit ang bata. Naibalik na kay Cristina ang kanilang anak. (Ulat ni Lordeth Bonilla)