Nakilala ang nasawi na si Claro Saragina, 44, ng #1603 Int. 8 F. Varona St. ng nasabing lugar at miyembro ng Sigue-Sigue Sputnik, samantalang pinaghahanap naman ng mga awtoridad ang suspect na si Wilfredo Saragina na mabilis na tumakas matapos ang insidente.
Sa ulat ni Det. Athos De Quiros ng homicide division ng WPD dakong alas-9 ng gabi nang maganap ang insidente sa panulukan ng Pitong Gatang at Masagana St.
Kasalukuyan umanong nakikipagkuwentuhan ang biktima ng bigla na lamang dumating ang nakakatandang kapatid nito at pilit na pinapauwi sa bahay si Claro subalit tumanggi ito. Nag-ugat na rito ang mainitang pagtatalo.
Hindi rin napilit ng suspect ang biktima na umuwi kung kaya ang una ang umuwi sa kanilang bahay at kumuha ng patalim at saka binalikan ang utol.
Walang sabi-sabing inundayan nito ng limang saksak sa katawan ang kapatid at saka mabilis na tumakas.
Isang manhunt operation ang inilunsad ng pulisya laban sa suspect. (Gemma Amargo Garcia)