Isang bank teller ang iniulat na nasugatan sa naganap na holdap.
Tumagal lamang ng limang minuto ang ginawang panghoholdap sa Bank of Commerce na rito nasugatan ang bank teller na si Rhodora de Joya. Tinamaan ito ng stray bullet nang magpaputok ang mga suspect sa loob ng bangko.
Ayon kay Supt. Popoy Lipana, hepe ng CPD-CIU naganap ang panghoholdap sa bangko dakong alas-10:30 ng umaga sa West Avenue malapit sa Zamboanga St. at Delta sa nasabing lungsod.
Lumilitaw na apat sa mga suspect ang naunang bumaba sa L-300 van at Toyota Corolla at mabilis na dinisarmahan ang security guard sa bangko at pagdaka’y idineklara na ang holdap. Mabilis naman kinulimbat ng ilan pa nilang kasamahan ang pera sa loob ng bangko, habang ang iba naman ay nagsilbing look-out sa labas.
Dalawang duffle bag na may lamang pera ang natangay ng mga suspect at habang papatakas ay nagpaputok ang mga ito ng baril para magkagulo at mabulabog ang mga bystander nang hindi na makahabol pa ang mga awtoridad.
Nabatid na pawang nakasuot ng kulay asul at itim na bonnet ang mga suspect.
Kasalukuyang nagsasagawa ng follow-up operation ang mga awtoridad para sa agarang pagkakadakip sa mga suspect na sinasabing nakatangay ng may P2.5 milyon cash. (Ulat ni Doris Franche)