Sa ginawang pagpupulong ng ilang tauhan ng DPWH sa Quezon City, sinabi ng mga ito na pinatalsik si Ronnie Albao dating Presidential Staff dahil sa pagkakasangkot nito sa ilang kuwestiyonableng transaksiyon kung saan ginagamit pa nito ang pangalan ng Pangulong Arroyo.
Ginagamit din umano ni Albao ang kanyang koneksiyon sa Malakanyang nang magbenta ito ng raffle ticket sa mga regional, district at project management offices dahil ikinakatwiran nito na ang kikitain ay gagamitin sa pagpapatayo ng simbahan sa Leyte.
Subalit ang nasabing raffle draw ay ilang ulit ipinagpaliban at wala namang nagsabi sa kampo ni Albao kung natuloy ito o hindi na.
Sinabi pa ng mga tauhan ng DPWH na nakikialam din si Albao sa promotion ng ilang opisyal ng kawanihan bagama’t ang mga ito ay hindi kuwalipikado. Kaya din umano nitong impluwensiyahan sa promotion ng ilang opisyal si Soriquez.
Nagtataka din sila kung bakit nananatili bilang DPWH Director ng Region 4-A si Bonner Seguit at Region 3 naman si Josefino Rigor samantalang may bago nang department order na ipinalabas para sa kanilang bagong assignment.
Simula anila ng maupo si Soriquez ay tumindi ang takot at faction sa loob ng organisasyon. (Ulat ni Doris Franche)