Namatay habang ginagamot sa Ospital ng Makati ang biktima na nakilalang si Armando Soriano, 54, ng #53 29th Ave Extension, Brgy. East Rembo matapos na magtamo ng dalawang saksak sa dibdib habang agad namang nakatakas ang suspect na nakilalang si Dondon Bautista, 52, ng nabanggit ding lugar.
Sa imbestigasyon ng pulisya, naganap ang insidente dakong alas-7:45 ng gabi sa harap ng isang tindahan sa 29th Ave. Extension nang magpa-alam na ang biktima sa suspect na uuwi na dahil nakakaramdam na siya ng pagkahilo dahilan sa pag-inom ng alak.
Ang pahayag ng biktima ang ginawang dahilan ng suspect sa pagsasabing bitin pa siya sa alak kung kaya’t hindi ito dapat na umuwi.
Matigas naman ang tanggi ng biktima hanggang sa kunin ng suspect ang kanyang dalang patalim at walang sabi-sabing inundayan ng saksak ang una.
Ayon naman sa mga saksi madalas na ginagawa ng suspect ang pamimilit sa kanyang mga nakakainuman dahil masyado na itong nagiging sugapa sa alak.
Nagkaroon na rin ng isang insidente na pinalo ng suspect ang kanyang dating kainuman nang ito ay kanilang iwan. (Ulat ni Lordeth Bonilla)