Balik kalaboso ang suspect na si Jose Radilla, binata at nanunuluyan sa 44-C Sto. Niño St., Tondo, Manila.
Sa ulat ng pulisya naganap ang insidente dakong alas-2 ng madaling-araw sa loob ng bahay ng biktimang itinago sa pangalang lola Simang na dito nakikipanuluyan ang suspect na si Radilla.
Bago ang insidente, napag-alaman na nakipag-inuman muna ang suspect sa mga kabarkada nito at madaling araw na ng umuwi sa bahay. Pinasok nito ang kuwarto ng matanda at sapilitan itong ginahasa.
Naulinigan naman ng apo ng biktima na si Marvin ang ingay sa kuwarto ng kanyang lola kung kaya sinilip niya ito at doon nakita niya na pinagsasamantalahan ng suspect ang matanda. Mabilis siyang tumawag ng mga tanod at isinuplong ito.
Naaktuhan pa ng mga nagrespondeng tanod na nakakubabaw ang suspect kay lola Simang.
Sa istasyon ng pulisya, inamin nito ang ginawa niyang panghahalay sa matanda, ngunit imbes na magsisi ay inalok niya ito ng kasal. Tumanggi naman ang matanda kung kaya balik kulungan ang suspect.
Napag-alaman na 15 taong nakulong ang suspect sa Bilibid dahil sa kasong murder at may ilang buwan pa lamang itong nakakalaya.(Ulat ni Danilo Garcia)