Ang nagreklamo na itinago sa pangalang Leny, ng Estanislao St., Maypajo, Caloocan ay dumulog sa WPD-General Assignment Section matapos na tumanggi si Ma. Eliza Ordoyo-Cruz, in-house Bingo Special Projects Officer ng PAGCOR na ibigay ang P500,000 niyang premyo.
Ayon kay Leny, nagtungo siya kasama ang tiyahin nito sa Casino Filipino-Caloocan Branch upang ipakita ang kanyang card na may serial number na 01054618-060 at dito kinumpirma itong nanalo ng nasabing halaga.
Bunga nito’y, sinabihan sila ng nasabing PAGCOR Branch na magtungo sa main office ng PAGCOR.
Nang puntahan ni Leny ang main office partikular na ang tanggapan ni Cruz ay sinabi umano nito sa kanya na mali ang numerong hawak nito at hindi siya ang nanalo ng kalahating milyon.
Malaki ang paniwala ng mga awtoridad na posibleng matagal ng raket ng ilang empleyado dito ang tulad umano ng ginawa ni Cruz.
Kasong estafa at swindling ang isinampang kaso ni Leny laban sa PAGCOR. (Ulat ni Grace dela Cruz)