Kinilala ang inireklamong guro na si Miss Luz Ramos ng Tonsuya Elementary School habang ang biktima nito ay itinago sa pangalang "Lito", 10, estudyante ng nasabing guro at nakatira sa SM Letre Rd., Brgy. Tonsuya, Malabon.
Nagtamo ang biktima ng mga gasgas at sugat sa kanyang tuhod.
Sa imbestigasyon ni PO3 Rios, naganap ang insidente dakong ala-1 ng hapon noong nakalipas na Biyernes sa nasabing paaralan.
Sa salaysay ni Lito, sinamantala nito ang paglabas ng kanyang gurong si Ms. Ramos upang kumuha ng bangko dahil sira ang kanyang upuan.
Nang bumalik ang batang estudyante, nagtuturo na si Ms. Ramos ng leksyon.
Upang hindi siya makita, paluhod na pumasok ang biktima sa kanilang silid-paaralan ngunit nakita ito ng nasabing guro.
Walang kaabug-abog umanong sinabunutan ng teacher ang estudyante bilang parusa nito at inutusan ang biktima na maglakad nang paluhod sa buong classroom ng sampung beses.
Pag-uwi ng bata sa kanilang bahay, agarang nagsumbong ito sa kanyang ina hinggil sa pagmamaltrato nito na naging dahilan naman upang ireklamo ng pag-abuso sa pulisya. (Ulat ni Jhay Quejada)