Kinilala ni Ferdinand Sampol, hepe ng BI Monitoring and Enforcement Unit (MEU) ang mga nadakip na suspect na sina Byeong Jun Park, 33, at Dae Sung Kim, 33. Ang mga Koreano ay nakatakda na sanang sumakay sa Asiana Airline patungong Seoul, South Korea nang masakote ng mga awtoridad.
Ayon kay Sampol, ang pagkakadakip sa dalawang dayuhan ay bunsod ng kahilingan ng Korean Embassy sa Maynila makaraang makatanggap ng ulat na naghahanda nang umalis ang mga suspect sa bansa para makaiwas sa mga awtoridad.
Sa isinagawang imbestigasyon, nabatid na ang dalawang suspect ay matagal ng pinaghahanap ng mga miyembro ng Western Police District matapos kidnapin ang kanilang kababayan na si Lee Chueng Kuen noong nakaraang buwan sa Malate. Nabatid na nagbayad lamang ng ransom ang biktima kaya ito pinalaya.
Samantala, patuloy ang isinasagawang manhunt operation sa iba pang kasamahan ng mga suspect na pinaniniwalaang nasa Maynila pa.(Ulat ni Butch M. Quejada)