Nakilala ang nasawi na si Ariscelo Tolentino, ng Blk. 18, Jeros St., Eusebio Ave., Nagpayong, Brgy. Pinagbuhatan, Pasig City.
Dead-on-the-spot ang biktima dahil sa maraming tama ng bala buhat sa magkakaibang kalibre ng baril.
Sa ulat ni PO3 Norman Barcellano, imbestigador, naganap ang insidente dakong alas-12:05 ng madaling-araw sa tapat ng videoke bar na pag-aari nito sa Pasig City.
Habang nanonood ng iba’t ibang uri ng fireworks, nilapitan ito ng dalawang hindi nakilalang lalaki na armado ng M-16 armalite at kalibre .45.
Hindi na nahalata ng mga residente ang iba’t ibang putok na tumama kay Tolentino matapos na paulanan ito ng mga suspect. Napansin na lamang ang biktima na duguang nakalugmok sa semento at wala nang buhay.
Parang walang anumang nangyari na naglakad palayo ang mga suspect dala-dala ang armas na ginamit sa krimen.
Kasalukuyang nagsasagawa ng mas malalim na imbestigasyon ang pulisya upang mabatid ang motibo ng pamamaslang at kung sino ang mga suspect. (Ulat ni Danilo Garcia)