Dead on arrival nang isugod sa Muntinlupa City Medical Center ang biktima na nakilalang si Chan Kenneth Soledeo, first year high school student sa Divine Mercy School at naninirahan sa Villa Olympia, San Pedro, Laguna.
Samantala, nakilala naman ang suspect na si Milo dela Cruz, 13, ng Chrysanthemum Village, San Pedro, Laguna.
Ayon sa salaysay ni Jerome Cabrera, kaklase ng dalawa kay PO3 Ronnie Tamondong, ng Muntinlupa Police naganap ang insidente dakong alas-8:30 kahapon ng umaga sa loob ng nabanggit na paaralan.
Nabatid na nag-away umano ang biktima at suspect sa hindi pa mabatid na dahilan.
Nagsuntukan umano ang dalawa hanggang sa mapuruhan ng suntok ni dela Cruz ang biktima na tumumba sa semento at nabagok ang ulo at nagsanhi ng agarang kamatayan nito.
Isang masusing imbestigasyon pa ang isinasagawa ng pulisya ukol dito. (Ulat ni Lordeth Bonilla)