Sinabi ni Atty. Josefina David, abogado ng mga inarestong sina Danilo Singh at Rolando Marcelo, ipaghaharap nila ng kaso sa CHR ang mga humuli sa dalawa dahil sa hindi makataong ginawa ng mga pulis sa mga ito.
Wala umanong kaabug-abog na inaresto ng mga pulis na hindi nakauniporme sa loob ng Jollibee food chain sa Philcoa sa harap ng maraming tao ang mga nabanggit, na ito ay isa sa itinuturing nilang paglabag sa karapatang pantao.
Agad din umanong piniringan ang dalawa at saka isinakay sa isang sasakyan at pagkatapos ay mabilis na iniharap sa media kasama ang mga matataas na kalibre ng armas.
Iba din umano ang mga pulis na humuli kina Singh at Marcelo at iba rin ang nagdala sa mga ito sa harap ng media.
Ang dalawang dinakip ay nakalalaya sa kasalukuyan matapos na magpiyansa sa kasong illegal possession of firearms. (Ulat ni Angie dela Cruz)