Inaresto ng mga kagawad ng Manila City Hall Detachment-Special Operations Group na nasa ilalim ng Western Police District-Station 5 ang naturang jailguard na si JO1 Jerry Manansala, nakatalaga sa Pampanga Provincial Jail at presong si Melchor Ong, 45, ng Block 22 Lot 9, Bagong Silang, Caloocan City.
Si Ong na may kasong drug pushing at walang inirekomendang piyansa ng piskalya doon ay sinasabing binibigyan ng VIP treatment ng nasabing jail officer sa pamamagitan ng madalas na paggu-goodtime sa mga nightclubs at KTV.
Sumasailalim naman sa imbestigasyon si Manansala dahil sa posibilidad na sangkot ito sa sindikato sa droga ni Ong.
Sa report ni Supt. Napoleon Taas kay WPD Director Avelino Razon, Jr., nakakumpiska pa umano ng tig-isang sachet ng shabu sa dalawang nabanggit na suspek.
Ayon kay Taas, sina JO1 Manansala at Ong ay naaktuhan ng kanyang mga tauhan na nag-iinuman sa loob ng Rendezvouz KTV club na nasa Padre Faura st., Ermita dakong alas-12:45 ng madaling-araw.
Nauna rito, isang intelligence report ang natanggap ng nasabing himpilan ng pulisya na luluwas umano si Ong sa Maynila para lamang ‘magpasarap’ kasama ang naturang jail officer mula sa nasabing kulungan sa lalawigan.
Kasalukuyang inihahanda na ang kaukulang kaso laban kay Manansala habang si Ong ay nakalaang iturn-over at ibalik ng mga pulis-Maynila sa nasabing piitan. (Ulat ni Ellen Fernando)