Ang bulan sa Pebrero maoy gitawag nga panahon sa gugma. Niining maong panahon momahal ang baligya nga mga bulak. Pagsugod pa lang sa Pebrero mahanggap na ang kahumot sa rosas nga naghulagway sa pagminahalay ug mainitong pagbinatiay sa duha ka binuhat nga naigo sa talinis nga udyong sa pana ni Kupido.
Ug pag-abot sa Pebrero 14, mahingpit ang katahoman sa gugma nga saulogon sa managhigugmaay nga naghambin og talagsaong pagbati sa usa’g-usa. Usa na kini ka tradisyon nga gisunod dili lamang sa mga ulitawo ug mga dalaga, kun dili hangtod na usab sa mga magtiayon nga naghatag og igong bili sa gugma.
Ang nagminahalay nga nagbaton sa kainit sa pagbati, mosangko sa bugnaw nga lawak. Sa sulod magtagik sila og balak sa gugma, usa ka ritwal nga nag-agos sa pagmahal. Ug paglabay sa usa ka bulan adunay magpatulo sa mga luha kay gitalikdan sa iyang hinigugma kay dili pa andam nga mosuong sa bug-at nga responsibilidad.
Busa man ugaling, angay mag-amping ang mga dalaga sa ilang hinigugma niining maong panahon. Simbako’g momabdos? Na, maangin ang maayong kaugmaon ilabi na’g mobiya ang lalaki nga nakapamabdos kay wala’y baroganan.
Ipabatyag sa tanang panahon
Angay ba lang diay hatagan og bili ang gugma sa bulan sa Pebrero? Ang gugma pagabation sa normal nga mga tawo. Ang gugma maoy taytayan alang sa panaghiusa. Ang gugma maoy dalan alang sa pagsabot ug pagtahod sa usa’g-usa.
Karong panahona nga nagsunodsunod ang mga kalamidad nga misulod sa Pilipinas ug sa kanunay nga kagubot sa Mindanao sa samang mga Pilipino, mahinungdanon kaayo nga ang usa’g-usa mopaambit sa gugma sa tanang panahon, dili lamang sa bulan sa Pebrero.
Ang rosas simbolo sa gugma. Sa tanang panahon tamnan nato’g rosas ang atong kasingkasing, atimanon nato kining maong buwak alang sa kalinaw sa nasud nga Pilipinhon. Mahinungdanon kaayo ang pagminahalay sa usa’g-usa ilabi na nagpasulabi karon sa kadaghanan ang kahakog sa gahom ug kuwarta.
Himuon natong Pebrero ang tanang panahon sa atong kinabuhi.