Ang tingog sa mikropono

Ning hapona mitungas ang magtiayong Neri ug Chona sa nabungtorang luna sa ilang banika sa Cabadiangan. Gisusi nila ang dagkong punoan sa ilang kakahuyan nga naglumbay haduol gayud sa pangpang nga gikaputan sa bagang mga bagon ug gitugkan sa gagmay’ng kakahuyan ang matag kilid nga bahin niini.

Ang puti nga bato sa maong pangpang mora’g dakong telon sa sinehan nga giyunyonan sa bagang kadahonan sa kakahuyan didto sa kinaibabwan.

“Nakontak na ba nimo ang tag-iya sa senso sa kasikbit nga baryo sa Cabadiangan, Ner...?” sukot ni Chona sa iyang bana nga padayong mipasarap sa panan-aw libot sa nabungtorang luna sa banika.

“Nakontak na nako si Bob, Chon! Siya ang mopalit ning dagkong kakahuyan aron iyang ipapuril ug ipagabas. Ugma, tan-awon niya kining 20 ka punoan sa dagkong kakahuyan nga karaan na kaayo...!”

“Mas maayo nuon, Ner! Nagkinahanglan ta’g kuwarta, busa bisan pa man kun kabilin kining dagkong punoan sa mga yakal, tugas, bayong, muwabog lawaan, bagarnga, himulbolan ug an-an, kinahanglan nga ibaligya na lang gyud nato...!”

“Gamit ra ba kaayo kining dagkong punoan sa karaang kahoy sa atong banika, Chon, diha sa pagpugong sa yuta nga dili modailos sa ubos, panahon sa ting-ulan ug tingbaha! Atua ra ba sa ubos nga patag ang atong balay...!”

“Nagkinahanglan man gud ta og dugang kuwarta, Ner, aron magasto sa pagpadayon og eskuyla sa bugtong tang anak sa kolehiyo. Mo-gradwar na ra ba ning tuiga si Michelle sa kursong chemical engineering!”

“Aw, sige gud! Ibaligya ug ipagabas man kaha nato ning dagkong punoan sa karaang kahoy sa atong banika...!”

Unya, kalit nga nahaigpot ang magtiayon sa ilang gitindogan. Gikan sa pangpang, may nabati silang tingog gikan sa usa ka sound system. Ug milanog ang tingog sa mikropono. Nanlimbawot ang mga balhibo sa panit nilang Nerio ug Chona. Apan dili nila masabtan ang gipamulong nga tingog gikan sa usa ka mikropono. Daw nakigsulti kini nilang magtiayon.

“Gikan sa mahabog nga pangpang ang tingog sa mikropono, Chon!”

“Bitaw, Ner! Mikropono sa mga engkanto...!”

“Lagmit supak sila nga atong ipapuril ug ibaligya ang dagkong punoan sa kahoy dinhi sa nabungtorang luna, Chon!”

“Apan nagkinahanglan ta’g kuwarta, Ner! Alingugngog kaayo ang tingog sa mikropono. Misantop sa hunahuna ni Nerio ang kalit niyang hukom. Kusog siyang misinggit nga nag-atubang sa mahabog nga pangpang.

“Dili na namo ibaligya ug ipapuril ang dakong punoan sa kakahuyan! Apan tabangi ming magtiayon nga masulbad ang among pinansiyal nga problema...!”

Kalit nga nahunong ang tingog sa mikropono gikan sa pangpang. Nagkatinan-away sila si Nerio ug Chona. Unya, may mitugpa sa ilang atubangan nga usa ka nagbagal nga brown envelope. Gipunit ni Nerio ug giukban. Nahasiga ang mga mata sa magtiayon. Nagpilit nga usa ka bandol nga papel de-banko nga pulos tibuok tagsa ka libo ka pesos!  Giihap ni Chona. Dugay. Usa ka gatos ka libo ka pesos. Ug nagkatinan-away sila si Nerio ug Chona, dayong lantaw sa pangpang. Nahilom na ang tingog sa mikropono. (Kataposan)