Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Daghan ang nag-ingon nga sa matag higayon nga mahitabo ang aksidente sa sakyanan nga mokalas o moangol og daghang mga tawo maoy naandan nga pagahimoon sa imbestigador sa kapolisan sa trapiko, Land Transportation Franchising and Regulatory Board (LTFRB) ug Land Transportation Office (LTO) ang paghimo og pakisusi sa mga hinungdan nga nakaingon sa aksidente.
Matud pa nila nga sa maong pakisusi nga pagahimoon sa maong mga buhatan sa kagamhanan maoy una nilang imbestigahon ang drayber sa sakyanan nga naaksidente sanglit mao man gayod kini ang matumbok nga sad-an ug maoy dakdakan sa mga pagbasol.
Lakip usab sa mabasol ang buhatan sa LTO kay taliwala sa estriktong proseso sa pagkuha og lisensiya alang sa pagmaneho og sakyanan sa gihapon makabaton man niini ang mga tawo nga kulang sa seminar.
Dugang pa nila nga sagad masinati sa mga mahitabong aksidente sa sakyanan ang kalit lang nga pagkawagtang sa drayber sa dapit nga nahitaboan kay mosibat man kini pahilayo sa kabalaka nga masugamak sa kulata sa masuk-anong sakop sa pamilya sa nahimong mga biktima.
Gitataw nila nga kun sa imbestigasyon nga pagahimoon nga depektoso ang sakyanan nga maoy nakaingon sa aksidente tataw usab nga maisip nga sad-an ang operator o tag-iya sa sakyanan nga nalambigit sa aksidente kay dili man maayo ang maintenance niini.
Ang dugang mga hinungdan nga maisip nga angay usab sa pagtulisok sa mga pagbasol ang tag-iya o operator sa sakyanan nga naaksidente tungod kay nag-hire man kini og drayber nga kulang sa tukmang kabangkaagan kay kulang sa training ug seminar sa mga lagda nga gilatid sa kadalanan ug abusado kini sa pagpadagan.
Gipasabot nila nga daghan hinuon ang mga hinungdan nga mahimong abusado ang drayber sa iyang pagpadagan og sakyanan sa kadalanan nga sagad makaingon sa mahitabong aksidente. Naglakip na niini mao ang paglambigit sa drayber sa sakyanan nga nalambigit sa paggamit sa ilegal nga drugas o hubog nga nagmaneho og sakyanan.
Tungod niini ang mga traffic investigator sa kapolisan mopa-ubos sa liquor test o sa pagpa-drug test sa drayber sa sakyanan nga naaksidente alang sa pagsuta kun dili ba kini hubog o high sa ilegal nga drugas atol sa pagmaneho nga nahitabo ang aksidente.