Ning buntaga, nasiklapan na usab ni Badong nga miduol kaniya si Titords. Nagsalig-ay kini sa baseyong sako nga sudlanan sa mapunit niyang mga basurang mahalin pa sa kadalanan.
“Noy Badong, manguha na sab ko’g kalibkib, ha...!” may pahiyom nga mibathay sa inosenteng panagway sa batang libudsuroy, nga nangabkab dayon sa mga bagol nga agi sa kudkoran ni Badong. Manumanong kudkoran ang panginabuhian ni Badong dinhi sa tiyanggihan sa ilang barangay. Paspas siyang mokudkod og lubi. Nagkadaghan ang iyang mga suki sa tiyanggihan kay wa man siya’y kakompetensiya. Sagad sa mga kudkoran de-elektrik na ug atua ang mga puwesto sa Carbon Market.
Nagpanglingo si Badong nga mitutok kang Titords nga nanglugit na sa mga kalibkib nga namilit sa mga bagol ug gisulod kini sa bata sa usa ka plastik bag.
“Noy Badong, makatambal nas kagutom kining kalibkib...!”
“Wa diay kay napunit nga basurang magamit pa, Dong Titords..?”
“Nihit na kaayo karon ang mapuslang basura, Noy! Maro na man kaayo ang mga basurero karon sa gobiyerno nga magsakay sa garbage truck. Sila nay mopihig sa mapuslan nga mga basura nga maoy ilang sayidlayen...!”
Nagyanguyango si Badong. Tinuod gayud ang gisulti ni Titords. Tungod sa kalisod sa panguwartahan karon, hasta ang mga basurero sa gobiyerno nga giasayen sa matag barangay, mao na ang mopihig sa mahalin nga basura ug ibaligya sa suking diyanksap.
Taudtaod, gibitbit na ni Titords ang plastik bag nga gisudlan sa mga kalibkib. Nanamilit kang Badong.
“Salamat sa kalibkib, Noy Badong! Makapugong na ni sa kagutom!”
Gihilap sa kaluoy si Badong. Mikuot siya sa iyang bulsa. Gipili niya ang pinikitan nga papel-de-banko, ang tiningub niyang kinitaan sa iyang manumanong kudkoran nga ideposito niya sa banko. Gihatagan niya si Titords og dosentos pesos! Hilabihang lipaya sa musimos nga bata nga bisan anha lang magpuyo sa aseras, apan milahutay sa pagpakabuhi.
Nagpanglingo si Badong nga misagnunot og tan-aw kang Titords nga milakaw. Nagkibotkibot ang iyang baba.
“Sa sama namong mga kabos, hangtod kanus-a pa kaha mahatagan og kaharuhay sa atong gobiyerno ang hanaphanap nga ugma sa sama ni Titords nga libudsuroy nga nagpakabuhi sa basura? Kanus-a pa kaha...?”
Gibuhian ni Badong ang lawom niyang pangagho nga naghunahuna sa hanap nga ugma ni Titords ug sa tanan niyang kaubanan nga libudsuroy nga kabataan. (Kataposan)