Gitakda na ang lima ka adlaw nga pagsumitir sa ilang certificate of candidacy (C0C) ngadto sa buhatan sa Commission on Election (Comelec) sa mga mokandidato alang sa 2013 local election nga magsugod sa petsa 1 ngadto sa Oktubre niining tuiga.
Sa maong mga adlaw bukas ang Comelec sugod sa alas 8 ang takna sa buntag hangtod sa alas 5 ug walay gihatag nga lugway nga oras ug labaw na nga mga adlaw alang sa pag-file sa ilang COC sa tanan nga mga kandidato. Nunot niining maong mga adlaw sa pagsumitir sa ilang COC sa mga mokandidato sa 2013 local election maoy masinati ang lainlaing paagi sa mga kandidato.
Matud pa nila nga sama sa naandan nga pagahimoon sa mga kandidato nga magdungan kini sa pag-adto sa buhatan sa Comelec ang mga kauban sa partido sa pagduso sa ilang COC.
`Dugang pa nila nga gawas nga magdungan ang mga kandidato sa usa ka partido sa pagduso sa ilang COC maoy himoon sa pipila kanila sa pagpakuyog sa ilang mga dumadapig sa pagpanon paingon sa Comelec sa ilang dapit.
Ang kasagaran sa mga mokandidato maoy ilang pagahimoon ang pagtambong una og misa sa simbahan sa pag-ampo sa atong Labaw nga Makagagahom sa pamasin nga dunggon ilang pag-ampo nga modaug sa ilang apilan nga bugnong lugaynon.
Ang pipila miingon nga labing sadya pa gayod ang uban nga mga partido nga mangangkon na nga modaug sa piniliay sanglit magdala pa kini og banda nga maoy magtambol sa ilang pagparada sa kadalanan sa ilang pagpaingon sa Comelec.
Hinuon adunay nag-ingon nga ang makita nga kalihokan sa mga kandidato sa mga adlaw nga gitakda alang sa pagduso sa ilang COC maisip lamang kining sinugdanan sa daghan pa nga mga kalihokan sa mga kandidato ilabi na gayod sa panahon sa mga adlaw sa ilang kampanya sa pagpaningkamot nga suportahan sa katawhan ilang kandidatura.