Sa nagkadugay ang mga adlaw sa pagsige’g hisgot sa Reproductive Health (RH) Bill, nagkaanam katin-aw kinsay nangusog pag-ayo aron maaprobahan na kining balaod sa Yawa didto sa House of Congress sa labing daling panahon.
Niadtong Agosto 6, matud pa sa usa ka kasaligang tinubdan, giimbitar og paniudto ang tanang kongresista didto sa Malakanyang, diin ang tumong ni Presidente Noynoy Aquino usa ra, ang pagkombinse sa mga magbabalaod nga paboran ang RH Bill the soonest possible aron hingpit na gyud kining mahimong balaod. Midugang sab si Alito L. Malinao, tagsulat sa ‘Ang mga bakak ug tinuod sa RH Bill,” Bisaya Magasin, Agosto 29, 2012, nga: “Daghan ang nagtuo nga ang balay sa Kamara sa pagka-karon hinigtan ang liog ni PNoy. Usa ra ang hinungdan nganong dili makalihay ang mga kongresista sa mando sa Malakanyang. Kini tungod sa Priority Development Assistance Fund (PDAF), ang pundo nga gigahin alang sa mga kongresista nga kinahanglang aprobahan sa palasyo una mahiadto sa ilang poder.”
“Ingon niini ang mahimong mahitabo sa RH Bill sa Kamara.” Padayong yawit sa artikulo ni Malinao. “Ingon niini kasimpli ang paagi sa Malakanyang. Kun gusto kang i-release ang imong PDAF botar pabor sa RH Bill kun dili ka mopabor, goodbye na lang sa imong PDAF. Kini mao ang mensahe sa Malakanyang ngadto sa mga kongresista.” Paita, sa?
Kitang voters adunay suffrage, the right to vote. Dili ba ang pagbabag niini pinaagi sa hulga makonsiderar man nga usa ka criminal act? Dili ba dakpon man gani ang mamalit og botos? Unya kining gibuhat sa Malakanyang ngadto sa mga kongresista, unsa man ni? Makiangayon pa ba ni? Using its power in a wrong way?
Dinhi atong makita kinsa sa mga kongresista ang buotan, ligdong ug matarong. Kinsa kanila ang adunay lig-ong baroganan nga dili matarog sa kasulaw sa salapi? Kinsa kanila ang makigbatok-pugong niining RH Bill ug dili mahimong balaod, bahala nag dili sila hataga’g PDAF sa Malakanyang? Kinsa kanila ang aduna pay pagtahod sa mga sugo sa Ginoo? Ug si kinsa kanila ang nagpaulipon na sa Yawa, niining mga linalang sa impiyerno nga maoy nagpaluyo niining makalilisang nga RH Bill? Makalilisang kay ang pagpatay man sa kinabuhi ang tumong niining balaora.
Kaanugon sa kahago sa mga pari ug madre niadtong EDSA 1986 revolution nga maoy nakapalingkod ni anhing Cory Aquino sa Malakanyang isip pangulo sa Pilipinas? Kaanugon sa hugot nga suporta sa mga alagad sa Diyos niadtong miaging Presidential Election aron lang makadaog si Noynoy Aquino? Abi nila’g pro-life si G. Aquino. Anti-life man diay? Wala kaha sila magmahay?