Attorney! Makeg-areglo na mi nimo. Aron maatras na ang mga kaso batok namo” ni Mario nga naggunit sa telepono sulod sa iyang buhatan sa barangay hall. Nakalugar siya’g panawag kay nahuman na iyang gihusay rong buntaga. Siya na lang usa sa barangay hall. Barangay Kapitan siya sa baryo Machopo.
Unya nakigkonsabo sa mga ahenteng hangyo lobo, land developers nga fly-by-night ug ubang mga korap nga official sa gobiyerno. Nakiha siya sa Ombudsman og violation sa Anti-Graft Law, sa City Prosecutor’s Office ug falsification of public document ug Contempt of Court sa husgado.
“Segurado ka, Kapitan? Wa na ba gyud moy dautang lihok batok nako?” tingog sa pikas linya ni Atty. Harry.
“Segurado na attorney. Surrender na mi” ni Mario.
Nanglantaw lahos sa bintana sa barangay hall. Nakita niya ang mga abono sa yuta nga gipaabunohan niya. Gipa-develop niya ang yuta bisa’g nasayod siya nga may kaso pa ang maong yuta. Ug nahanduraw niya ang nanglabay.
Kay nagdulong na ang eleksiyon ug nagkinahanglan siya’g kuwarta igasto alang sa paglansar niya para-reelection, napugos si Mario og pakigkunsabo sa mga sindikato. Dunay dakong lang developer nga gusto mo-develop og napulo ka hektaryang luna sa barangay Machopo.
Walo ka hektarya ang yuta nga dili problemado. Nasikbit ang duha ka hektarya nga kasamtangang gipatitulohan ni Mrs. Deborah. Kinsi ka tuig na ang kaso sa pagpatitulo nga pending sa husgado. Tungod sa mga paryente ni Mario nga maoy nibabag sa pagpatitulo. Si Atty. Harry nga abogado ni Mrs. Deborah, lunod patay ang paglaban sa kliyente. Kay ang amahan ni Mrs. Deborah sa buhi pa, maoy nakatabang sa abogado sa iyang pag-eskuyla ug sa pagkuha’g bar.
Ang mga paryente ni Mario nangangkon nga mga sumosunod sila ni Orlando Kiyamko nga tag-iya sa maong yuta. Apan nasuta ni Atty. Harry nga dili tinuod nga tag-iya si Orlando Kiyamko . Claimant lang siya sa yuta, sumala sa record sa DENR. Unya sa record sa Cadastral, wa kaprobar sa iyang claim. Naglawig ang kaso pabor ni Mrs. Deborah.
Apan ang sindikato kay kuwartahan, pinangulohan og usa ka drug lord nga mismo si Mario wa kaila, napalit ang opisina sa Tasador aron maka-isyu og laing tax deklarasyon ngadto sa ngalan sa laing tawo. Ang maong ngalan maoy gisakyan sa mga ahente ug developer sa yuta. Mismo si Mario niisyu sab og sertipikasyon nga bakak aron lang maka-isyu og tax declaration ang opisina sa tasador.
“Ang insaktong areglo, paliton ninyo ang yuta sa presyo sa akong kliyente” sa pikas linya sa unang hinabi nila.
“Mahal man kaayo iyang presyo!” ni Mario.
“Kuwartahan man ang sindikato nga imong higala” ni Harry.
“Ang maayo pa buk-an tika’g ulo attorney!” ni Mario masuk-anon.
“Kun moduol ka nako nga wa’y dala imong ulo, basig ako rang ulo mabuak” ni Harry.
Ang sindikato ray bahala nimo!” ni Mario.
“Kun kaming mga tarong tawo, mahadlok ninyo nga mga dautan, wa na mi kadaganan pa. Kay tanang lugar lukop nas mga dautan. Kamong mga dautan maoy angay mahadlok sa mga buotan” ni Harry. Gibundak ang telepono.
Dako og gasto ang sindikato. Subra bayente na ka hitman ang gisulohan pagpatay ni Atty. Harry. Way nilampos. Dako nilang kahibulong. Kay way bodyguard ang abogado. Maglakaw-lakaw lang gihapon nga mao rang usa. Unya ang mga hitman, dili ka duol ilang mga motorsiklo. Kay kun mohana sila’g tupad sa kotse sa abogado, may madasmagan silang gahi nga butang pero di makita. Giabyan ang abogado og armored car nga di makita.
“Unsa may sekreto nimo Attorney? Nga wa may makahilabot nimo?” ni Mario.
“Ampo ra gyud Capt. akong sekreto. Sa kada-lakaw nako, moingon lang ko’s Ginoo nga itugyan nako niya akong kinabuhi” ni Harry.
“Abi man nako’g wa nay abogadong mosampit og Ginoo” ni Mario. “Duna pa gyu’y diyutay. Usa na ko ana” ni Harry. Ug nagkinataw-anay sila’s telepono.
“Ako nang ipa-draft ang compromise agreement sa among abogado. Ipabasa unya nako nimo kun kauyon ba ka ug imong kliyente” ni Mario.
“Sige. Maghulat ko” ni Harry. Gibutang ni Mario ang telepono. Ug nahinumdom siya sa iyang nabasahan sa Bibliya nga si Goliath nga usa ka higante, gipatay ni David nga usa lang ka bata. Wa diay dili mabuntog sa ngalan sa Diyos. (Kataposan)