Wala gayud tuod dayon mopauli si Tacio tungod sa hangyo ni Joy kaniya. Gisubli-subli nila ang pagtagay sa kalipay. Diha na mipauli si Tacio nga gabii na kaayo ug nangatulog na ang mga tabian niyang silingan.
"Salamat kaayo Tass ha sa pagtabang nimo nako nga makobra dayon ang pensyon sa akong namatay'ng bana. Dugangan ko unya na ang gihatag ko nimo," matud ni Joy dihang mainampingon nga nanaug si Tacio sa balay.
Nagpanglingi si Tacio samtang mainampingon nga naglakaw palayo sa balay ni Joy. Mingaw na ang palibot ug wala nay mga tawo, Nalipay si Tacio kay sa unahan may nakita siya nga nagsingabot sa iyang nahimutangan nga usa ka taksi.
Mapahiyumon kaayo si Tacio dihang nakasakay na siya sa taksi paingon sa ilang dapit sa T. Padilla Extension. Didto siya sa luyo nga bahin sa taksi naglingkud. Gikuot ni Tacio sa iyang bulsa ang bayente mil pesos nga gihatag ni Joy.
Nalipay kaayo si Tacio nga sa hamubo lang nga higayon naka bayente mil pesos siya ug nalipay pa g'yud. Wala gayud magtuo si Tacio nga moabut kining sitwasyona kaniya ug ni Joy. Dugay'ng nakatulog si Tacio pag-abot niya sa iyang gipuy-an.
Ang tinuod ulitawo pa si Tacio bisan sa iyang pangedaron nga 39 na. Si Joy bag-o pa lang nga nag 25 sa miaging buwan. Layo kaayo ang pangedaron ni Joy ug sa namatay niyang bana nga 63-anyos na sa dayong pagkamatay.
Mora'g wala makasabut si Tacio sa iyang kaugalingon. Bisan sa iyang pagkadukirok sa mga babaye apan daw nadutlan siya kang Joy. Daghang mga pyor gayud nga dalaga nga naangkon ni Tacio apan sila igo lang gibiyaan ni Tacio.
Wala makasabot si Tacio kun nganong lahi ang iyang gibati karon kang Joy. Naglimbang-limbag siya sa iyang higdaanan. Nakahuna-huna siya nga teksan si Joy. Gusto siya nga tug-anan si Joy sa iyang gibati nga daw dili malaksi sa iyang kaisipan ang panagway sa babaye.
"ThanksTass, maayo unta og dili ra ko nimo binuangan," reply ni Joy. Gihuna-huna ni Tacio nga kun iyang tinud-on ang pakig-relasyon ni Joy, haruhay siya kay duna kini binuwan nga pensyon nga madawat mata'g buwan.
Ang problema lang kay dili sila mahimo nga magminyo aron dili maputol ang pensyon ni Joy gikan sa SSS. Pagkabuntag, ang selpon maoy unang gipunit ni Tacio. Wala na diay siya makabantay nga mi text kaniya gabii si Joy.
"I love you, good nayt." Nalipay kaayo si Tacio. Gi-reply niya ang message. "Good morning Joy, I love you." (Sumpayan)