Pak! Mipiti ang nawong ni Bedrong sa pagsagpa ni Zheal. Namuwa, nahulma ang palad ni Zheal sa wala nga aping ni Bedrong. Naaninag ang mga blood corpuscles kay lusparon man siya’g nawong. Ug wa madugay dihay mitulo nga dugo gikan sa bugas nga dako diha sa nawong ni Bedrong. Mitulo usab ang luha sa iyang usa ka mata nga naigo sa pasagpasagpa ni Zheal, kaganina. Nasuko man gud si Zheal nga gisultian niya’g I Love You!
“Sige, sulti pa ro’g usab adtong pulonga, kay lat-an ko gyud nang nawong nimong buanga ka!” Singhag ni Zheal nga nanulisok ang wala nga kamot ug nanighawak ang tuo.
“Dautan ba diay kadtong mga pulonga nga gipadungog ko kanimo, Zhea?” Mapahiyumong pamulong ni Bedrong.
Walay sakit kaniya ang maong sagpa. Naghatag hinuon kini sa iyang dughan sa tumang kalipay ug pagmaya nga nahidapat ang palad sa usa ka binuhat nga naghatag og cholesterol sa iyang kasingkasing.
“Sagpaa pud ning pikas aping, bi,” ni Bedrong nga nagngisi.
Wa ka uroy mauwaw! nawong nimo, morag kabaw! Unya, manguyab ka nako? Di mahitabo ang Beauty and the Beast sa tinuod nga kinabuhi. Do!” Banghag ni Zheal.
Midag-um ang langit ning udtong dako. Daw kahilakon tingali nga nakasaksi niining sitwasyona sa pagpadayag ni Bedrong sa iyang gugma ni Zheal. Lunch break nila. Nagbarug sila sa may hardin uban sa landong sa dakong kahoy nga akasya, sud sa ilang school campus.
Nakalugar og duol si Bedrong kang Zheal kay nag-inusara kining nalingkod sa lingkoranang semento nga giliyok niining maong kahoy.
Mingaw kay nanglaag ug namauli sa balay ang kadaghanan sa mga estudyante.
Fourth year high school si Bedrong. Potot, 3rd year high school si Zheal. Gwapa ug taas nga babaye. Muse sa ilang classroom. Section Pearl. Busa, sayon-sayonon lang niya’g dapat si Bedrong, taga abaga ra gud ni niya.
“Kung ako lang nawong pasultion, Zheal, di gyud unta tika panguyaban. Apan, unsaon man, gimandoan man ko sa akong dughan. Ikaw ang gisinggit niini adlaw’ng tanan, ikaw ang gimahal. Gisugo ko niya sa pagsulti’g I Love You, kanimo, Zheal!” ni Bedrong nga mikupot sa kamot ni Zheal.
“Naana sad ka anang pulonga, ha! kupot-kupot ka pa sa akong hands, inataya, ka” kini imo, ay! umph!”
Natikuo si Bedrong nga naigo ang lagay sa pagpatid ni Zheal.
“Bwisit! pwe!” Gilud-an ni Zheal ang nawong ni Bedrong. Da! usab pa ka?! ni Zheal.
Suko kaayo iyang nawong. Gisigaan niya sa iyang mata ug ilong si Bedrong.
“Di nako mousab kausa nalang!” tubag ni Bedrong nga nagtila-tila sa luwa ni Zheal nga midaligdig sa iyang baba, nga nagngisi.
“Yakkkkssss! ka-Dirty!” Nakatawag ahat si Zheal ug dayong dagan. (Katapusan)
Sidlak