Sa nagdangadanga na siya sa karsada, nalantawan niya sa may tindahan ni Inse Miray didto sa unahan ang upat ka managhigala -- sila si Minggoy, Ecloy, Gener ug Roman. Langas kaayo sila. Kadali rang nakapakanaog og pangagpas ang iyang hunahuna. Nag-inom na usab tingali ang upat. Nailado na sila sa ilang dapit sa ilang pagka palahubog. Maghilak ang adlaw kun dili mapula ang ilang tapay. Anaa ra sila kanunay magyampungad sa mga tindahan ug imnanan.
Paghitungod ni Melchor sa tindahan, iyang nasuta ang hinungdan sa kagahob sa upat ka palahubog. Ila diay’ng gihimong kalingawan si Usting nga buang. Ila kining gipabalak ug gipasayaw. Ang alaot nga nalisoan sa pangisip daw karnero nga mituman sa gisugo nila, kaha sa kahadlok nga ilang pasakitan.
Gitanyagan si Melchor ug ilimnon ni Ecloy pagkamatikod niini sa iyang pag-agi. Nibalibad siya. Wala siya pugsa nila. Nakaila na sila kaniya. Nasayod na sila nga dili siya moinom og ilimnong makahubog. Misaylo siya sa ilang nahimutangan ug mipadayon paglakaw.
Apan ang iyang hunahuna nahibilin niadtong buang nga si Usting. Dili taga Antuwanga si Usting. Kalit lang kining mitungha sa ilang dapit. Walay nasayod sa kagikan niini. Kun may mangutang taga diin siya ug kinsay iyang mga ginikanan, motubag siya nga naggikan siya sa yuta sa saad ug kaliwat siya ni Presidente Carlos P. Garcia. Pangataw-an siya sa mga tawo. Kay kinsa bay motuo sa iyang gisulti nga usa man lagi siya ka buang? -- Sumpayan pa