Samtang nag-deal sa lamesang Baccarat, napulos ang atensiyon ni Salgo, card dealer sa iyang kustomer nga bading. Dako na man gud ni’g pilde. Luya na kaayo tan-awon ang bayhon samtang naggunit sa baraha.
“Haskang malasa ning kuwarta sa mga Amerikano, uy!” Mahay-tuaw sa seksing bayot dihang ang puntos nga iyang nakuha: 8, pero ginuybehan pa gyod sa balay. “Abi nimo, Dodong,” gikuhit niya ang card dealer. “Nakaupat na gyod ko rong adlawa, Do! Kapoy na kaayo ko, uy! Superb man gud kaayo ning mga foreigner serbisyohan. Eksibisyonista! Maayo gani, dagko’g hinatagan.”
Nakurat si Salgo sa iyang nadungog. Ingon sa di makatuo. Segun gud sa iyang nahibaw-an, ang bading maoy mobayad sa lalaki. Ug dili ang lalaki. Pero ning gitabi sa iyang kustomer, bali ang nahitabo. Ang bayot maoy gibayran sa lalaki. Buanga, sa?
Pangutan-on pa unta ni Salgo ang bayot apan wala madayon kay may taasong Koreano nga miduol ug mitupad paglingkod sa bading.
“Fifty thousand pesos, okay?” Gibutanga’g lima ka tag diyes mil pesos ang atubangan sa bading.
Abi ni Salgo og ipasugal. Pastilan, gipunit man sa bading, unya gisulod sa bulsa dayong barog ug miingon:
“Okay, let’s go! What room?” Hastang ubang kustomer nga nakakita ug nakadungog misigang mata. Labihan gyong nakatutok sa bading nga nagmini-skirt lang kuyog sa Koreano nga ning higayona loving kaayong nanggawas sa balay-sugalan paingon sa kuwarto sa hotel.
Human niadto, wala na makit-i ni Salgo ang bading. Asa na kaha mupaingon ang bruha?
Sabado, Day-off ni Salgo. Giimbitar siya ni Adolfo, balikbayan niyang amigo nga bag-o lang miabot sa States. Nag-barhopping sila. Pagkahubog, gidala si Salgo ni Adolfo ngadto sa mahalong kasa nga aduna kunoy mga indayhilay nga grabe ang performance sa kama.
Pag-abot nila didto, pinaagi sa gamay’ng lilianan sa eleganteng showroom, namili sila. Mga guwapa gyod tinuoray ang ilang nakita. Woww legs pa! Human makapili, mikuha dayon sila’g lainlaing kuwarto diin ang nagbayad lakip na sa ilang napili, si Adolfo.
Pwerteng luyaha ni Salgo paggawas sa kuwarto. Unya samtang nagbarog sa lobby, may mipikpik sa iyang luyo - si Adolfo ug ang linalang nga gikauban niini didto sa lawak-lipaylipayan. Haskang kurata ni Salgo dihang naklaro niya kinsa ang gikakuyog sa iyang higala -- kadto diay’ng bading nga wala na niya makit-i didto sa balay-sugalan nga iyang gitrabahoan. “Enjoy ka ba, Dong? Mao ni ron uso sa Amerika!”
Milingolingo si Salgo. Kay kun nasayod pa lang siya nga kining ilang gianhi, kasa diay sa mga prosting bayot, di gyod unta siya mouban. Sus, pirstayim nga nahilabtan siya’g bading! Wa gyod siya magtuo, ay! Igo na lang tawon sa pagpanghupaw ang pobre: “Hahayyy, naunsa na ba ang kalibotan karon?” (Kataposan)