“Ganahan ka diay mosul-ob sa akong KBP jacket?” nagngisi si Loloy nga nangutana sa MassCom student.
Dali kaayo nga nakayango-yango si Jane. “Imo ning ihatag nako Sir?” Gitutokan ni Loloy ang dalaga ug nasuta niya nga tininuod ang iyang giingon nga nakagusto kini sa iyang jacket nga adunay giborda nga KBP sa tuo nga bahin sa dughan.
“Sige, ihatag na lang nako na nimo Jane, magpatahi na lang ko og bag-o nga jacket kay layo pa man ‘sab ang Septiyembre 2 nga maoy opening parade sa mga broadcasters sa radyo ug TV dinhi sa dakbayan sa Sugbo,” pasabot ni Loloy.
Hilabihan ang kalipay nga gibati ni Jane ug wala niya kalikayi nga napa-agbay siya ngadto ni Loloy nga nagtindog daplin sa oditoryom samtang naminaw sa diskurso sa mga tinugyanan sa City Hall kabahin sa city scholarship.
“Scholar ka ‘sab diay sa city Jane?” gipangutana ni Loloy ang dalaga. Mitangdo ang MassCom student dungan ang pagbuhi sa usa ka matam-is nga pahiyom nga mibathay sa iyang mga ngabil.
Daw naglaway nga nagsud-ong si Loloy sa panagway ni Jane. Wala gayud mobiya si Jane sa oditoryom hangtud nga nahuman na ang kalihukan sa City Hall.
“Babay Loy, text unya ha?” matud ni Jane dihang misugod na pag-aginod ang sakyanan nga modala na nila ni Loloy balik sa City Hall.
Milabay ang mga adlaw. Nakadawat og text message si Loloy gikan ni Jane. “Tabangi ko bi, gusto mi mag-intern sa radio.” Tuod, gitabangan ni Loloy nga madawat pagka intern sila si Jane ug duha niya ka kauban apan didto niya gipasulod sa lain nga sibyaanan.
“Loy sa reporter sa polis ko gipakuyog-kuyog pagpangita’g balita. Maayo unta to og diha ko sa imong estasyon nag-intern,” matud ni Jane sa iyang text message kang Loloy. Giawhag ni Loloy si Jane nga magbantay kay daghang mga reporter sa polis mga tsikboy.
Pagka hapon, nakadawat og laing text si Loloy gikan ni Jane. “Patudlo ko nimo unsaon pagsuwat ang news report bi, kita unya ta human sa imong trabaho,” matud ni Jane. “Sigi, teksan tika unya kun human na ko sa akong trabaho diri,” dali kaayo nga nakatubag si Loloy.
Gihapit g’yud tuod ni Loloy si Jane sa estasyon sa radyo diin siya nag-intern. Kadto maoy nakapasuod kaayo nila ni Loloy ug Jane. Gikan niadto, kuhaon na kanunay ni Loloy si Jane didto sa estasyonan sa radyo. (Sumpayan)