Gula 12
Migawas sila si Mayor Antigua ug Max gikan sa buhatan sa nahauna. Apan sa hagdanan nasugatan nila si Romy, ang pangabaga ni Max, nga naghangos. Didto sa gawas sa munisipyo namatikdan nila nga kalit lang migahob.
“Naa sa gawas ang mga lumolupyo sa Punta, Mayor,” taho ni Romy. “Daghan kaayo sila ug nanagdala’g mga plakards.”
“Unsa?” sa mayor pa nga midali pagbalik sa sulod sa iyang buhatan. Midungaw siya ngadto sa ubos.
Tuod, nakita niya ang bagang duot sa katawhan. Nanagbitbit sila’g lainlaing mga plakards nga gisulatan sa mga pulong: “Mayor Mamerto Antigua itoy sa mga langyaw, Antigua kurakot, Mayor Antigua dangan sa mga kabos, ilegal ang imong gibuhat kanamo mayor ug giyatakan nimo ang among tawhanong katungod.
Nagpaminti si Mayor Antigua sa kasuko. Milighot ang lain niyang pangusmo. Wala tuyoa, nahalingi siya ngadto nila ni Max ug Romy nga nagbarog sa iyang luyo. Salabtonon ang tinan-awan ni Max kaniya.
“Ingon niana ang mga kabos kun maoy pasipad-an, Mayor,” ni Max pa. “Sama usab sila sa putyokan nga maghiusa pagpamahit kun hilabtan ang ilang katungod sa pagpakabuhi. Lisod silang santaon. Gagmay ug huyang man tuod sila apan baga ug daghan man usab.
Mipitokpitok ang mga mata ni Mayor Antigua. Dihay pagtulun-an nga milugdang sa iyang hunahuna. -- Kataposan