Nagkurog ang kamot ni Padre Fel nga naggunit sa telepono. Alas sayis pa sa buntag sulod sa kombento sa San Sebastian Parish. Wa pa siya kainom og kape. Apan grabe ang iyang nerbiyos. Nagduhaduha siya kun himoon ba niya ang pagtawag. Nakiglalis siya’s iyang kaugalingon. Nangita siya’g bug-at nga rason nga igong makahatag og katarungan sa iyang pagsupak sa balaod sa simbahan. Nga dili ibutyag ang sekreto sa kumpisalan.
Kagabii may nikumpisal niya. Usa ka samarong tawo. Grabe ang mga samad. Delikado ug di na siya maluwas adtong mga samara. Tulo ka agi sa bala. Usa sa tiyan, usa sa dughan ug usa sa toong abaga. Usa siya ka rebelde. Ug naengkwentro niya ang mga pundok sa militar sa bukirang bahin sa lungsod sa Amiraw diin nahisakop ang parokya ni Padre Fel. Nangumpisal ang rebelde nga nitug-an sa ngalang Abner. Gisugid niya ang tanan niyang mga kasal-anan. Ug ang katapusan ug pinakadako niyang sala, wa pa mahitabo. Ug mahitabo gyud kun di molihok si Padre Fel.
Sa gamay pa si Padre Fel, wa siya’y hilig nga magpari. Gusto siyang magpiloto og ayroplano. Apan sige na siyang gigalgal ni Papa Lino ug Mama Susan niya nga magpari. Mga aktibong miyembro sa parokya iyang mga ginikanan. Si Lino miyembro sa Ador-ador, Cursillo, Charismatic ug usa ka lay minister. Si Susan miyembro sa CWL. Sila ang tigpasiugda sa mga kalihokan makadlawon. Kanang gitawag og Aurora. Wa gyud sa hilig ni Fel ang magpari.
Gani, hilig siya’g tsiks. Hayskul pa, tulo na ka buok iyang uyab. Hilig siyag mga malaw-ay nga mga basahon. Nagpalitan siyag mga bargain nga Playboy Magazine, Penthouse, mga VHS ug CD nga X rated. Apan wa sab matuman niya iyang ambisyon. Di mosugot si papa niya nga magpiloto siya. Gawas pa ana, bisa’g mosugot pa siya, di siya kabuot sa gastohan sa pagpiloto.
“Bisa’g milyonaryo pa ta, di ko mosugot nga moeskuyla ka’g pagkapiloto. Way maayong laki anang kursoha. Di ka matiguwang ana. Inig kadaut sa makina sa ayroplano sa ibabaw sa panganod seguradong mohugpa gyud ka dayon. Maayo pa Nautical na lay kuhaa. Sa barko ka na lang. Kay gawas nga kaya nato ang matrikula, kun ang barko maaberiya, molutaw man gihapon na,” ni papa niya, usa ka buntag sa ilang paghinabi.
Way nahimo si Fel. Nisabot na lang siya sa iyang amahan. Labi na nga daghan pa silang mga anak nga patunghaonon adtong tungora. Lima sila ka buok. Ang ilang kamaguwangan nga si Maria, nagkuha og Nursing. Siya ang sunod. Ang iyang mga manghud nga sila si Rito, Mel ug Ben naa pa sa hayskul.
“May pa magpari ka na lang. Dugay na kong nag-ampo nga dunay anak nako nga magpari,”ni Papa Lino niya. Nihilom si Fel.
Maglisod gyud tinood og gasto ang mga ginikanan ni Fel kun magpiloto siya. Nagkinahanglan ang maong kurso og dos sentos ka oras nga gitawag og flight hours. Ug tag tres mil pesos ang kada oras sa paglupad. Si Lino usa lang ka clerk sa opisina sa tasador sa ilang munisipyo. Si Susan niabag-abag og paninda sa merkado sa ilang lungsod.
Tuod man, nakahuman og Nautical si Fel. Nisakay isip usa ka agregwo sa m/v Balambeno nga gipanag-iya sa Shem Shipping Lines ning dakbayan. Cebu-Manila ang rota. Tungod sa kadagko sa bawod usahay ang dulong sa barko mohana og tidlom ilawom sa bawod. Daghang mga pasaherong nanagsuka.
“Ginoo tawon. Kun maluwas ko ining biyahea nga makadunggo ang barko, isaad nako nimo nga mosulod na ko sa seminaryo,” hilom nga pangaleya ni Fel. Hilabihang lipaya sa mga ginikanan ni Fel sa iyang hukom.
“Alas otso ugma sa buntag molarga ang m/v Balambeno. Duna koy gibutang nga bomba sa kinailadman sa makina sa barko. Mobuto to sa alas diyes sa buntag human sa duha ka oras nga paglawig,” ni Abner sa iyang pagkumpisal kagabii sa kombento.
Naglanog gihapon ning mga pulonga karon sa alimpatakan ni Padre Fel.
“Lima ka libo ka pasahero ang kapasidad sa maong barko!” tuaw ni Padre Fel. “Angay’ng molihok dayon ko,” hukom niya.
Hilom siyang nangayog pasaylo sa Diyos sa pagsupak niya sa sekreto sa kumpisalan. (Katapusan)