Gula 2
Bisan og dinali-dali, apan gikahinangop na ni Boy ang nahitabo kanila ni Beth. Diha niya masuta nga gimahal gayud siya sa iyang girlfriend. Kay gitugyan man kaniya ang iyang pagkababaye.
Buntag na sila nga mipauli. Gihatud ni Boy si Beth didto sa ilang balay sa Barangay Luz. Sanglit Domingo man, wala dayon mopauli si Boy ug giandaman sila og makaon sa inahan ni Beth. “Basin baya og imo lang binuangan kining akong anak Boy ha?” giingnan sa inahan ni Beth si Boy.
Abtik nga nakahimo og sinyas nga panumpa si Boy ngadto sa inahan ni Beth. Gipasalig niya nga pakaslan niya si Beth. Wala magtingog ang dalaga nga nakadungog sa pasalig sa iyang boyfriend.
Milabay pa ang daghang mga adlaw. Ang nahitabo kanila ni Beth ug Boy didto sa baybayon, nasundan pa og laing mga higayon didto na sa mga motel. Hangtud nga paspas ang pagdagan sa panahon, migradwar na sila si Boy ug Beth sa koleheyo.
“Andamon na nato ang atong kasal Beth kay nakahuman na man gayud kita sa atong pagtoon,” giingnan ni Boy ang iyang girlfriend usa ka higayon niana. Apan gibalibaran siya ni Beth kay matud pa dili pa siya gusto nga mahigot sa responsibilidad.
Walay nahimo si Boy pagpugos ni Beth. Milabay ang mga adlaw ug nakatrabaho si Beth isip assistant sa usa ka engineer nga nagtrabaho sa dakung construction company dinhi sa dakbayan.
Gikan niadto, bisi na kanunay si Beth ug usahay dili na gani makatagad sa pagreply sa mga text messages gikan ni Boy. Sa hilom, gibati na og kabalaka si Boy sa naobserbahan niya nga kausaban sa kinaiya ni Beth.
Diha’y higayon nga gipangutana ni Boy ang girlfriend kun ngano nga usahay dili na kini motubag, apan misangpot lang hinoon sa panaglalis. Nasabtan ni Boy nga may kausaban na sa tinagdan kaniya si Beth. (Sumpayan)