Gula 6
Gimandoan niya sila sa pagdemolis sa tanang kabalayan sa mga lumolupyo sa Punta nga mihagit sa iyang garbo. Kini na lang ang kataposang paagi nga iyang nahunahunaan aron mapugos sa pagpahawa ang katawhan nga nagpuyo sa maong dapit. Mahinungdanon labaw sa tanan alang kaniya ang pabrika nga tukoran ni Kee Lai Tong sa Punta.
Nagtuo si Mayor Antigua nga mahimo na niya sa dakong kasayon ang pagpademolis sa kabalayan sa mga lumolupyo sa Punta. Misalig siya sa iyang mga sinugo. Alang kaniya, ang mga kabos nga katawhan sa Punta sama lang sa mga kuto nga sayon rang dugmokon sa iyang mga kamot.
Mibati nag kalaay si Mayor Antigua samtang nag-irag sa silyang tuwang-tuwang sulod sa iyang buhatan. Gitutokan niya ang telepono nga gipatong ibabaw sa talad sa iyang atubangan. Napaak niya ang gigunitang bolpen samtang ang panan-aw miukob pag-ayo sa telepono nga nagpakahilom sukad pa kaganina.
Takulahaw dihay midagpi sa iyang hunahuna. Gibakyaw niya ang iyang kamot pagkab-ot sa awditibo. Gidayal ang pito ka numero sa iyang pinuy-anan. -- Sumpayan pa