Gula 12
Iya dayon kining gipunit ug gisulingsuling. Nakita niya nga nagkadugo ang dughan sa langgam nga naintimano gayod pagkaigo.
Mialimbukad sa mga ngabil ni Maambong ang balbangaan nga kahimuot. Misanag ang iyang nawong nga gibuboan og kahayag sa naghingudto nga adlaw nga milusot sa mga giwang sa mga dahon sa kahoy. Napamatud-an niyang superyor ang iyang katakos. Wala pa gayod tay-i ang iyang pulso. Hingigo pa gihapon siya. Sukad masukad sa iyang pagpangayam, wala siya mahinumdom nga nasipyat siya pag-igo sa gipusil niyang langgam bisan makausa. Niini gidayeg niya ang iyang kaugalingon. Alang kaniya, wala pa matawo ang lalaki nga makaambas sa iyang abilidad. Ug kining maong hunahuna gihungit niya sa pagpatuo sa iyang kaugalingon, daw tawong andakan nga miunay pagbaswat sa iyang lingkoranan.
Mipadayon si Maambong sa pagpangayam. Sa matag langgam nga iyang pusilon, dili lang tuyoon nga manumbalay sa iyang hunahuna si Santino. May salida sa iyang handurawan nga siya ray nakakita. Magpaminti siya nga mohugot paggunit sa airgun. Sa sangi sa iyang kaisipan dihay panagtigi tali kaniya ug ni Santino. Giisip niya nga si Santino maoy kaindig sa pagpamusil sa mga langgam nga iyang giayam ug dili siya buot nga malupig niini sa kahingigo. Tuod man, wala’y sipyat ang iyang mga tayada. -- Sumpayan pa