Gula 1
Sayong gitugaw ni Maambong ang kamingaw nga naglublob sa sabakan sa lasang sa Umakba. Wala pa gani mauga ang yamog nga nangumpayot sa mga dahon sa mga sagbot ug mga kahoy, nagtikawtikaw na siya sa kabanwaan, wala’y kalainan sa usa ka mapangahasong dumuduong nga nangita’g dagitunon. Napugwat ang nahinanok pang lasang sa makapakurog nga hinagtob sa iyang mga tunob. May ihalas nga mga kinaiya nga nanggimok pagkamatikod sa langyaw niyang mga lihok.
Nagbitbit siya sa airgun nga maoy iyang gamiton sa pagpangayam. Hulagway siya sa usa ka maisog nga manggugubat nga nangahas pagtaak sa teritoryo sa iyang mga kaaway. Kiat kaayo ang iyang mga mata nga mihangad sa nagwakat nga mga sanga sa kahoy nga naglambungay ang mga dahon aron pagpangita og langgam nga maayam, mora’g singgawong nga nangita’g tukbonon. Gusto siyang makaayam og daghang mga langgam karon. Kini usa ka tahas nga gisangon sa iyang kabubut-on sa iyang kaugalingon. Sa iyang handurawan, siya’y lokal nga bersiyon ni Tom Cruise sa Mission Impossible. -- Sumpayan pa