Kun ikaw makasimhot og humot, molumpayat ang imong kaugatan, motuyhakaw imong kahiladman, moturok imong kahinam. Mabalisa ka, gusto nimong ubanan ang hangin ug sination ang gipahumotan ug hangpon hangtud sa imong katagbawan, dili ka gayud mabangbang. Pagbantay lang sa imong pagpanimhot og humot, sa tuyo nga mohangop, mousisa sa nagpahumot basin masugamak ka sa dakong kamot nga ikakumotkumot sa imong nawong nga mahiligon og humot!!!
Si Berting Palikero nakakita og matahom nga binuhat nga nangalimyon sa kahumot. Iyang gituparan, gipabati sa iyang mga pulong gamhanan. “Bulak, pwede bang makahibalo ko?” ni Berting nga nitupad og lingkod sa babaye.
“Unsaaa!!!” naisa ang tingog sa babaye. “Kapresko gud nimo. Dili Bulak ang akong pangalan. Wala man ko makaila nimo. Palihug lang ayaw ko og samoka. Naa koy gihulat,” pulong sa babaye nga pinaiknat ang kilay.
“Sultian tika Bulak ang imong kahumot nagtukmod kanako nganha kanimo. Bisan pa og dili ko makahibalo sa imong pangalan, pahibaloa lang ko sa imong pahumot ug sa imong gipahumotan,” ni Berting nga nanukad. Naghinamhinam na nga nagpaabot sa matag pulong nga buhian sa babaye.
“Bay, kasikit gud nimong nakalingkod diha tupad sa akong asawa. Unsa? Nagpasingit ka sa imong kaibog?” pulong sa lalaki nga naputos sa patik ang mga bukton. Maskulado, bungoton ug siga kaayo og mata nga walay pupamilok nga nagtan-aw ni Berting.
“Pagkadakoa sa patik nga kalabera sa lalaki sa may braso,” pulong ni Berting sa hilom samtang nagtan-aw sa lalaking maisogon kaayong nangutana kaniya.
“Ah, Bosing, nakatupad ko sa imong asawa kay nadapit man gud akong pagtagad sa iyang pagkamaayong modala sa iyang pahumot. Naninda man gud ko og pahumot, ako lang gisuwayan basin og makauyon siya. Ikaw pud diay Bosing, basin duna kay plano. Mahatagan tika og maayong presyo,” pulong ni Berting nga nagpanglad-ok sa iyang laway.
Gikulbaan si Berting bisan pa sa iyang nalitok nga palusot. Pagkadakoa ra ba sa patik nga kalabera sa lalaki sa may braso.
“Dali na Trina, mouli na ta. Nalangan man gud ko sa pagpyansa dugay naabot ang nagdala sa kwarta. Dako man gud ang pyansa sa akong kaso. Resulta ni sa problema nga nakapasakit ko sa akong pagkaseloso diha nimo,” dayong kawhat sa kamot sa iyang asawa aron makabarog.
“Salamat Bosyo nga nakagawas na ka gikan sa halwa,” pulong sa babaye nga mahinangpon kaayo sa lalaki.
“Swerte ka Bay nga bag-o pa kong nakapyansa.”
Taudtaod nga wala makatingog si Berting. Naghinuktok. Naglumba og dagayday ang dagko niyang singot gikan sa agtang padulong sa iyang nangluspad nga panagway. (Katapusan)