Gula 3
Pagka gabii, dugay nga nakatulog si Ruben. Wala niya tuyoa nga mipasunding sa iyang huna-huna si Maricor. Nalipay si Ruben nga nakatabang siya ni Maricor nga makobra pagdali ang cash incentive sa iyang apohan.
Nahukman ni Ruben nga teksan si Maricor. “Kumusta Mar, wala na ba hilanti si Lola nimo?” Nagkalingaw og pindot-pindot sa selpon si Ruben ug gipang-erase ang wala na niya kinahanglana nga messages. Takulahaw lang mitingog ang iyang message alert. Gikan gayud ni Maricor ang text. “Arng-arng na si Lola, wa na kaayo hilanti ky nakainom na mn og tambl. Ingn si Lola paarion ka sa birthday niya karng Sabado.”
Nakahuna-huna si Ruben nga himoan og paagi nga makasabot si Maricor nga may gitagoan siya nga pagbati kaniya. Naghinuktok siya makadiyot ug dayon gipindot-pindot ang iyang selpon.
“Gusto unta ko moanha Mar apan mahadlok ko nga masakitan lang unya,” matud ni Ruben. Wala magdugay nakadawat siya’g reply gikan ni Maricor. “Ha? Ngano man tawon Ben?”
“Na love at first sight ko nimo pagkakita ganina ug maayo na lang nga patyon nako daan kay sa imong kagwapa mora’g imposible nga mosugot ka nako,” matud ni Ruben.
Mahinamon nga nagpaabot si Ruben sa reply ni Maricor. Apan milabay na lang ang pipila ka gutlo, walay reply nga miabot. Wala na usab mo-text si Ruben kang Maricor.
Nakatulog na lang si Ruben. Wala niya tuyoa nga nagdamgo siya kang Maricor. Malipayon kaayo si Ruben kay nakigpanuroy kaniya si Maricor. Nagunitay sila sa kamot nga nanuroy daplin sa baybayon. Apan nakurat si Ruben ug Maricor kay nagsingabot sa baybayon ang daku kaayo nga bawod. Nagdungan sila sa pagsinggit ug milukso aron nga dili mabasa sa tubig gikan sa daku kaayo nga bawod.
Dungan nga nahigmata si Ruben gikan sa iyang katulogon. Naghangos si Ruben nga naghuna-huna sa iyang damgo. Mibangon siya ug miinom og tubig. “Unsa kaha’y kahulogan sa maong damgo?,” nakapangutana siya sa iyang huna-huna.
Human makainom og tubig si Ruben, gipunit niya ang iyang selpon ug gitan-aw. Diha pa niya masayri nga may text diay nga iyang nadawat gikan ni Maricor.
“Duna na man ko’y boyfriend Ben. Hinuon dili pa man ko minyo,” tubag sa dalaga. Tungod niini, nahuna-huna ni Ruben nga matinud-anon lang si Maricor nga wala molimod nga duna siya’y boyfriend, apan andam ra siya nga panguyaban. (Sumpayan)